Saturday, November 12, 2016

തങ്ങളും തട്ടിപ്പും

തങ്ങൾക്ക് നേരെ വരുന്ന വിപത്തുകളെ പോലും മുൻകൂട്ടി കാണാനോ തടുക്കാനോ സാധിക്കാത്തവരാണ് കേരളത്തിലെ എല്ലാ സിദ്ധന്മാരും ബീവിമാരും തങ്ങന്മാരും പണിക്കന്മാരും ബാബാമാരും അമ്മമാരും.
അതിനുള്ള അവസാനത്തെ ഉദാഹരണമാണ് ഹൈദ്രോസ് സിദ്ധന്റെ തകർച്ചയും അറസ്റ്റും...
ഇനി തന്റെ സിദ്ധിയിൽ തരിമ്പും വിശ്വാസമില്ലാത്ത നല്ലൊരു വക്കീലിനു മാത്രമേ അയാളെ രക്ഷിക്കാൻ സാധിക്കൂ. അതുമല്ലെങ്കിൽ ഒരു രാഷ്ട്രീയക്കാരന്.
അപ്പോൾ ആരാണ് ശരിക്കും സിദ്ധന്മാർ ?
എന്താണ് ഇവന്മാർക്കുള്ള സിദ്ധി ?
 
 

Thursday, November 10, 2016

White (Men) House !!!


ഹിലാരി തോറ്റു, പെണ്ണായതിനാൽ തോറ്റു... !

അമേരിക്കയിലെ വെള്ളക്കാരന്റെ മനസ് ഇനിയും ഒരു പെണ്ണിനെ തങ്ങളുടെ രാഷ്ട്രനായികയായി ഉൾക്കൊള്ളാൻ വളർന്നിട്ടില്ല എന്നതിന്റെ പ്രതിഫലനമാണ് എല്ലാ കഴിവു കേടുകൾക്കിടയിലും ട്രംപിന്റെ ട്ട്രുംഫ്.

ഇതുവരെയുണ്ടായ സംവാദങ്ങളിലെയും, സ്ത്രീകളുടെയും, ന്യൂനപക്ഷങ്ങളുടെയും, കറുത്തവരുടെയും, ലാറ്റിൻ അമേരിക്കക്കാരുടെയും പിന്തുണ കൊണ്ടും, പ്രസിഡന്റ് പദത്തിലേക്ക് മത്സരിക്കുന്ന ആദ്യ സ്ത്രീ എന്ന നിലക്കും മു൯തൂക്കം ഹിലാരിക്കായിരുന്നു. സ്ത്രീകൾക്കെതിരെയും ന്യൂനപക്ഷങ്ങൾക്കും കുടിയേറ്റക്കാർക്കും എതിരെയും അപക്വ നിലപാട് സ്വീകരിച്ചിട്ടും, ലൈംഗിക ആരോപണങ്ങൾ ഉണ്ടായിട്ടും, വരേണ്യ വർഗ്ഗത്തിന്റെ ആളായിട്ടും, ട്രംപ് ജയിച്ചത് ലോകപോലീസ് പട്ടം സ്ത്രീകൾക്ക് കൊടുക്കുന്നതിലുള്ള അവിടത്തെ വെള്ളക്കാരന്റെ അസഹിഷ്ണുത കൊണ്ട് മാത്രമാണ്. സ്ത്രീ-ഡെമോക്രാറ്റ് വിരുദ്ധരായ അമേരിക്കയിലെ വെളുത്ത വർഗക്കാരുടെ വോട്ടാണ് ട്രംപിന്റെ പെട്ടിയിൽ വീണത്.

ഇന്ത്യക്കും പാകിസ്ഥാനും ബംഗ്ളാദേശിനും ശ്രീലങ്കക്കും സാർക്കിനും ഏഷ്യക്കും അഭിമാനിക്കാം. 1960കളിൽ ആദ്യമായി ലോകത്ത് ഒരു വനിത രാജ്യത്തെ നയിച്ചത് ശ്രീലങ്കയിലാണ്. സിരിമാവോ ഭണ്ഡാരനായക. പിന്നീട് നമ്മുടെ ഇന്ദിര ഗാന്ധിയാണ്. ബ്രിട്ടീഷ് പ്രധാനമന്ത്രിയായി മാർഗററ് താച്ചർ പോലും ഒരു ദശാബ്ദത്തിന് ശേഷമാണ് അധികാരമേറിയത്. അവർക്ക് ശേഷം ബ്രിട്ടണിൽ ഈയിടെ മാത്രമാണ് ഒരു വനിതാ പ്രധാനമന്ത്രി വന്നത്. ജർമനിയിലും ഓസ്‌ട്രേലിയയിലും ഒക്കെ ഈയിടെ മാത്രം വനിതാ രാഷ്ട്രത്തലവന്മാർ ആയി. ബേനസീർ ഭൂട്ടോ, ഖാലിദാ സിയ, ശൈഖ് ഹസീന തുടങ്ങിയ മുസ്ലിം രാഷ്ട്രനായികമാർ പോലും ഇവരുടെ എത്രയോ മുമ്പ് കഴിവ് തെളിയിച്ചവരാണ് എന്ന് മുസ്ലിം വിരുദ്ധനായ ട്രമ്പിനെ ട്വീറ്റി അറിയിക്കണം.

അമേരിക്ക ഒരു കറുത്തവനെ പ്രസിഡന്റ് ആക്കിയത് ഈയിടെ മാത്രമാണ്. ഇനിയും അമേരിക്കയിലേക്ക് നോക്കാൻ പറയരുത്. നമുക്ക് നമ്മിലേക്കും അയൽരാജ്യങ്ങളിലേക്കും നോക്കാം. ഇന്ത്യയേക്കാൾ സ്ത്രീകൾക്ക് സ്വാതന്ത്ര്യവും അവസരങ്ങളും ഒക്കെ അവിടെയാവാം, എങ്കിലും അതൊക്കെ വൈറ്റ് ഹൗസിന് വെളിയിൽ വരെ മാത്രം.

Thursday, August 25, 2016

ഗുരുദ്വാരയും ജാറവും - യാത്ര

         പത്തുദിവസത്തെ വടക്കെ ഇന്ത്യൻ യാത്രയിലാണ് ഒരു സിഖുകാരനെ അടുത്തു പരിചയപ്പെടുന്നതും ഒരു പഞ്ചാബി ഹൗസ് സന്ദർശിക്കുന്നതും. ഞങ്ങളുടെ ടെമ്പോ ട്രാവലർ ഓടിച്ചിരുന്ന ബൽബീർ സിംഗ് തികഞ്ഞ മത ഭക്തനായിരുന്നു. രാവിലെ വണ്ടി സ്റ്റാർട്ട് ചെയ്താൽ പിന്നെ രണ്ട് മണിക്കൂറിലധികം നീളുന്ന പ്രാർത്ഥനാഗീതം, ആദ്യമൊക്കെ അരോചകമായി തോന്നിയെങ്കിലും പിന്നീട് അതൊരു ശീലമായി മാറി. ആ പ്രാർത്ഥനയിൽ 'റഹ്മാനും കരീമും സർവ്വേശ്വരനും ജഗദീശ്വരനും' ഒക്കെ ഉണ്ടായിരുന്നു. ആദ്യ ദിവസം ക്ഷമ കെട്ട് പാട്ട് ഇടാൻ പറഞ്ഞപ്പോൾ അതാ വരുന്നു പഞ്ചാബി ഖവാലി. അതോടെ ആ പറച്ചിൽ ഞങ്ങൾ നിർത്തി പ്രാർത്ഥനയിൽ ലയിച്ചിരുന്നു. 

          പിന്നീടുള്ള ദിവസങ്ങളിൽ ബൽബീർ, ഗുരുനാനാക്കിനെ പറ്റിയും അദ്ദേഹം മക്കയിൽ പോയതടക്കമുള്ള കഥകളും, സുവർണ ക്ഷേത്രത്തിലെ പുണ്യതീർത്ഥം കുടിച്ചു സുഖമായവരുടെ അപസർപ്പ കഥകളും, സിഖുകാർ മുഗളന്മാരുമായി നടത്തിയ വീര പോരാട്ടങ്ങളുടെ കഥകളും സ്മാരകങ്ങളും മുമ്പിൽ നിരത്തി ഞങ്ങളിൽ പ്രബോധനം നടത്തിക്കൊണ്ടിരുന്നു. പിന്നീട് ആനന്ദപൂർ സാഹിബിലെ ഗുരുദ്വാരയിലേക്ക് ഞങ്ങളെയും കൊണ്ട് ഒരു സന്ദർശനം. ഗുരുദ്വാരയിലേക്ക് പോകുന്നവർ നിർബന്ധമായും പ്രാർത്ഥിക്കേണ്ട ഒരു മുസ്ലിം ദർഗ സന്ദശനം (വാവരെ പള്ളി പോലെ). ഇതൊന്നും പോരാഞ്ഞ് സ്വന്തം വീട്ടിലേക്ക് ഞങ്ങളെ അതിഥികളായി കൊണ്ടുപോയിക്കളഞ്ഞു ബൽബീർ .
 
         ദിനേന മാറുന്ന പല വർണ്ണങ്ങളിലുള്ള തലപ്പാവ് കുളിക്കുവാൻ വേണ്ടി അഴിച്ചു വെച്ചത് മക്കൾ കയ്യോടെ പിടികൂടി. സിഖുകാർ ഒരിക്കലും പ്രദർശിപ്പിക്കാത്ത നീണ്ട കാർകൂന്തൽ അടക്കം ഫോട്ടോയെടുക്കാൻ മക്കളെ സമ്മതിച്ചതിലൂടെ സർദാർജി വീണ്ടും ഞങ്ങളെ വിസ്മയിപ്പിച്ചു.
സഹയാത്രികർ : പ്രശസ്ത ബ്ലോഗർ അക്ബർ വാഴക്കാടും കുടുംബവും.

മുക്രിപ്പണി.

2 August at 12:42  ·
      പള്ളിയിയിലെ ഇമാം എന്തോ കാരണത്താൽ രാജി വെച്ച് പോയി. ഏതാനും ദിവസങ്ങൾക്കകം തന്നെ അഞ്ച് നേരത്തെ ബാങ്ക്‌വിളി പള്ളിക്കമ്മറ്റിക്കാർക്ക് ഒരു ഭാരമായി തുടങ്ങി.

       മുട്ടുശാന്തികളായി തങ്ങളുടെ കൗമാരപ്പടയെ നിയമിച്ചാലോ എന്നായി അവരുടെ ഗൂഡാലോചന. പക്ഷെ താക്കോൽ സ്ഥാനം ബാപ്പയുടെ സ്വന്തം മകനാണ് കിട്ടിയത്. കലാലയ ജീവിതം കഴിഞ്ഞു പാരലൽ കോളേജിലും മദ്രസയിലും പരിലസിക്കുന്ന കാലത്താണ് ഈ ഗ്രാൻഡ് മുഫ്തി നിയമനം. അനുജൻ അടക്കം നാലഞ്ച് അസിസ്റ്റന്റ് മുഫ്‌തിമാരും. സുഹൃത്തുക്കൾ ഗ്രാൻഡ് മുഫ്തിക്ക് പെരുമാറ്റ ചട്ടം ഉണ്ടാക്കി.

*പള്ളിയുടെ അന്തസ്സ് കളയുന്ന ഒരു പണിക്കും പോവരുത്.
*ഫിലിം റിലീസ് ആവുന്ന മുറക്ക് കോഴിക്കോട് പോയി അവർ കാണുമ്പോൾ ഞാൻ സിനിമ കാണുന്നത് തന്നെ നിർത്തിവെക്കണം.
*കേരളോത്സവം, ഗ്രാമീണ വേലകൾ, ഉത്സവങ്ങൾ, ഗാനമേളകൾ എന്നിവക്ക് പോവുന്നതിൽ വിരോധമില്ല. പക്ഷെ സമയത്തിന് ബാങ്ക് കൊടുക്കാൻ പള്ളിയിലെത്തണം.

        അതോടെ എ൯റെ കൗമാര ചക്രവാളങ്ങൾ ചുരുങ്ങി ലോകം കുടുസ്സായ പോലെയായി. അസിസ്റ്റന്റ് മുഫ്തിമാർക്ക് എന്തുമാവാം, നമുക്ക് മാത്രം ഒന്നും പറ്റില്ല. എന്റെ മുമ്പിൽ വെച്ച് അവർ കണ്ട സിനിമാ കഥകൾ പറഞ്ഞെന്നെ മോഹിപ്പിച്ചു. കളികൾക്കും കാര്യങ്ങൾക്കുമിടയിലെ രസച്ചരട് പൊട്ടിച്ചു കൊണ്ട് ബാങ്ക് വിളിയുടെ സമയം എപ്പോഴും എന്നെ തുറിച്ചു നോക്കിക്കൊണ്ടിരുന്നു. ആറുമാസം ഒരു യോഗിയെപ്പോലെ ഞാൻ കഴിച്ചു കൂട്ടി.

        സത്യം പറയണമല്ലോ, അത്രേം നല്ലൊരു ആധ്യാത്മിക ജീവിതം പിന്നെയൊരിക്കലും എനിക്ക് കിട്ടിയിട്ടില്ല. ആറുമാസത്തെ മൊല്ലാക്കപ്പട്ടം പുതിയ മൊല്ലാക്കയുടെ തലയിലണിയിക്കുമ്പോൾ ജയിൽ ജീവിതം കഴിഞ്ഞു പുറത്തിറങ്ങിയ പ്രതീതിയായിരുന്നു.
അങ്ങിനെ ഒരു പള്ളിക്കാലം ഓര്മിപ്പിച്ചതിന് നന്ദി പിള്ളേച്ചാ...
 

കൊലയാളി മുക്ക് (മിനിക്കഥ).

 
          കൊലയാളി മുക്കിൽ ദിവസവും രാഷ്ട്രീയ കൊലപാതകങ്ങൾ അരങ്ങേറി കൊണ്ടിരുന്നു. സർവ്വകക്ഷി യോഗവും സമാധാന യാത്രയും സമാധാന സമ്മേളനവും നടത്തി നേതാക്കൾ മാതൃകയായി. പക്ഷെ ഒരുപാട് രക്തപ്പുഴകൾ അവിടെ വീണ്ടുമൊഴുകി.

          പരസ്പരം കൊണ്ടും കൊടുത്തും മരിച്ചു വീഴുന്നവർക്ക് രക്തസാക്ഷി മണ്ഡപങ്ങൾ പണിത് കൊണ്ട് നേതാക്കന്മാർ പുഷ്പാർച്ചനയും പ്രാർത്ഥനയും നടത്തി. അതോടെ രക്തസാക്ഷികളാവാൻ യുവാക്കൾ മത്സരിച്ചു. തിരിച്ചുവരാത്ത അന്നദാതാവിനെ ഓർത്തു പാർട്ടിയില്ലാത്ത ഒരു പാട് വയറുകൾ കണ്ണീർവാർത്തു. നേതാക്കന്മാർ അനാഥ കുട്ടികളെ മാറോട് ചേർത്ത് ആശ്ലേഷിച്ചു മത്സരിച്ചു. 

           അവസാനം ഉറ്റവരും ഉടയവരും നഷ്ടപ്പെട്ടവരുടെ എണ്ണം ക്രമാതീതമായി വർദ്ധിച്ചു. അവർ കക്ഷിയേതര രഹസ്യയോഗം സംഘടിപ്പിച്ചു. പല വഴികൾ ആലോചിച്ചു. അങ്ങനെ ഐക്യ കൊലയാളിമുക്ക് ഗുണ്ടാസംഘം രൂപീകൃതമായി. അവർ രായ്ക്കുരാമാനം രക്തസാക്ഷി മണ്ഡപങ്ങൾ അടിച്ചു തകർത്തു.

          പിറ്റേന്ന് പ്രഭാതം പൊട്ടിവിടർന്നതു സമുന്നത നേതാക്കന്മാരുടെ ഞെട്ടിപ്പിക്കുന്ന കൊലപാതക വാർത്തകളോട് കൂടിയായിരുന്നു. ഓരോ ദിവസവും ഓരോ പാർട്ടിയുടെ നേതാക്കന്മാർ വധിക്കപ്പെട്ടു കൊണ്ടിരുന്നു. മരണഭയം മൂലം നേതാക്കന്മാർ പുറത്തിറങ്ങാതായി. പലരും ഒളിവിൽ പോയി. രക്തസാക്ഷികളാവാൻ കല്പനകിട്ടാതെ പ്രതിശ്രുത രക്തസാക്ഷികൾ വിറങ്ങലിച്ചു നിന്നു.

         നേതാക്കൾ ഇല്ലാതായതോടെ സമാധാന കമ്മിറ്റികൾ കൂടിയില്ല. സമാധാന യാത്രയും സമാധാന സമ്മേളനവും സംഘടിപ്പിക്കപ്പെട്ടില്ല. ഒരു അനുയായി പോലും കൊല്ലപ്പെട്ടുമില്ല. ഒരു രക്തസാക്ഷിമണ്ഡപവും പിന്നീട് ഉയർന്നു വന്നില്ല. പിന്നെയൊരു നേതാവും കൂലി കൊടുക്കാ൯ പറഞ്ഞില്ല.
 

Thursday, January 28, 2016

സരിതാമ്മയുടെ മുഖ്യമന്ത്രി പദം

 ഇത്രയേറെ വിശ്വസ്തതയും സ്വാധീനവും സൗന്ദര്യവും ചിരിയും ഒത്തിണങ്ങിയ സരിതയെ പിടിച്ചു തമിഴകത്തെ 'അമ്മ'യുടെ മാതൃകയിൽ മുഖ്യമന്ത്രി സ്ഥാനാർഥി ആക്കുന്നതിനെ പറ്റി എല്ലാവരും ഗൗരവമായി ചിന്തിക്കണം.
തനിക്ക് ചുറ്റും ഒരു മന്ത്രിസഭയെ ഭ്രമണം ചെയ്യിച്ച അനുഭവ സമ്പത്ത്. ആഗോള താപന കാലത്ത് കേരളത്തെ ഇരുട്ടിൽ നിന്നും രക്ഷിക്കാനുള്ള സൌരോര്ജ്ജ തന്ത്രം.
തമിഴമ്മയോട് ഡാമിന് വേണ്ടി ഏറ്റു മുട്ടാൻ നമുക്കും അതെ ഹിസ്റ്ററി ഉള്ള അമ്മ വരട്ടെ.
പോലീസിനെ കോയമ്പത്തൂർ വരെ ഓടിച്ച ബിജൂന്ന് അഭ്യന്തര വകുപ്പ് തന്നെ കൊടുക്കാം. മാണിയുമായി ധനകാര്യ ബന്ധമുള്ള മറ്റേ ബിജൂനെ പിടിച്ചു ധനമന്ത്രിയും എക്സൈസും കൊടുക്കാം.
നാലാം മുന്നണി സിന്ദാബാദ്‌.
മദ്യ കേരളം
മദാലസ കേരളം

Monday, January 4, 2016

വെജിറ്റബിൾ ബിരിയാണി

ഒരു അടുപ്പിൽ ചോറ്. മറ്റേതിൽ പച്ചക്കറി. 
യുദ്ധക്കളം പോലെ കത്തികളും കൈലുകളും പച്ചക്കറി അവശിഷ്ടങ്ങളും അടുക്കളയിൽ ചത്തു കിടക്കുന്നു.
ക്രോണിക് ബാച്ചിയായ സുഹൃത്ത് കുക്കിംഗ്‌ മഹാമഹത്തിലാണ്.
കറിയിൽ വെള്ളം വറ്റിത്തുടങ്ങിയിട്ടുണ്ട് എന്നറിയിപ്പ് കട്ടിയുള്ള പുകയായി പുറത്തുവന്നു. അവൻ ചോറ്റി൯ പാത്രം മൂടി കൊണ്ട് അടച്ചു തുണിക്കഷ്ണം കൂട്ടി മെല്ലെ ഉയർത്തുന്നു. ശ്രദ്ധയോടെ അതിലെ കഞ്ഞിവെള്ളം കറിയിലേക്ക് ഒഴിച്ചു കൊണ്ടിരിക്കുന്നു.
ഈ പരജാതി പരാഗണം പകരലിന്റെ പരിസമാപ്തിയിലാണ് എന്റെ രംഗപ്രവേശനം.
അവന്റെ അവിഹിതം ഞാൻ കണ്ട ജാള്യത ഒരു ചിരിയിലൂടെ ഓവർ ടേക്ക് ചെയ്യാൻ ശ്രമിക്കുന്നതിനിടയിലാണത് സംഭവിച്ചത്.
പാത്രത്തിന്റെ അടപ്പ് അടിഭാഗം തുറന്നു ചോറ് കുറെ കറിയിലേക്ക് പതിച്ചു.
നിമിഷാർദ്ധം കൊണ്ട് കാസ്പറോവിനെ വെല്ലുന്ന വിദഗ്ധമായ ഒരു മൂവ് നടത്തി അവൻ, പണ്ട് ഗാന്ധിജി സൌത്ത് ആഫ്രിക്കയിൽ വെച്ച് ചെയ്തതുപോലെ ബാക്കി ചോറ് കൂടി കറിയിലേക്കിട്ടു നന്നായി ഇളക്കി ഒരു സങ്കര ജീവിയെ വറ്റിച്ചെടുത്തു.
മുതുകാട് പോലും നടത്താത്ത പ്രകടനം കണ്ടു പകച്ചു പോയ എന്നോട് "വെജിറ്റബിൾ ബിരിയാണി റെഡി...വെജിറ്റബിൾ ബിരിയാണി റെഡി" എന്ന് പറഞ്ഞത് കേട്ടാണ് ഞാൻ ഞെട്ടലിൽ നിന്നും ഉണര്ന്നത്.
വയറു നിറയെ ബിരിയാണി തിന്നു വരികയാണെന്ന് പറഞ്ഞു രക്ഷപ്പെട്ടത് ഭാഗ്യം. അല്ലേല് അവന്റെ വെജിറ്റബിൾ ബിരിയാണിയുടെ ആദ്യത്തെ ഇര ഞാനാകേണ്ടി വന്നേനെ.
ഈ റെസിപി ഇന്നും അവന്റെ പേറ്റന്റ്‌ ആണ്, ആരും കോപ്പി ചെയ്യരുത് എന്ന് പ്രത്യേകം പറഞ്ഞിട്ടുണ്ട്.
ഇതുപോലുള്ള അനുഭവങ്ങൾ ഉണ്ടായവർ കമ്മന്റ് കോളത്തിൽ പേറ്റന്റിനു അപേക്ഷിക്കേണ്ടതാണ്.


ലിംഗ സമത്വം മഹാശ്ചര്യം, നമുക്കും കിട്ടണം ഫേസ് ബുക്ക്‌ ഇല്ലാത്തൊരു ഭാര്യയെ.

        വിവാഹിതരായ സ്ത്രീകൾ ഭർത്താവിൽ നിന്നോ ഭർതൃ വീട്ടുകാരിൽ നിന്നോ ഏറെ അനീതിക്കിരയാവുന്ന ഒരു രംഗമാണ് കലാസാഹിത്യ പൊതു ഇടങ്ങളിലെ ഇടപെടലുകൾ. പുരോഗമനം പ്രസംഗിക്കുന്നവരും ഇക്കാര്യത്തിൽ പിന്നാക്കം നിൽക്കുന്നതാണ് ഇതിലെ ട്രാജഡി.

          ഏറ്റവും മികച്ച ഉദാഹരണം സമൂഹം ഇച്ചിക്കുന്നതിലേറെ സ്വാതന്ത്ര്യം അനുവദിക്കപ്പെടുന്ന സിനിമയാണ്. കല്യാണത്തിന് മുമ്പ് കാമുകിയായും കുടുംബിനിയായും തന്നോടൊപ്പം തകർത്തഭിനയിച്ച സഹനടിയെ കല്യാണം കഴിക്കുന്നതോടെ അഭിനയം നിര്ത്തിക്കുന്ന നടന്മാർ, പക്ഷെ ലിംഗ സമത്വം സമ്മതിച്ചു സ്വന്തം അഭിനയം അവസാനിപ്പിക്കുന്നില്ല. അവർ മറ്റു സ്ത്രീകളുടെ കൂടെ അഭിനയം തുടരുമ്പോൾ നടി ഇഷ്ടമില്ലാതെ കാലിലെ ചിലങ്കകൾ അഴിച്ചു വെക്കുന്നു. അല്ലെങ്കിൽ വേർപിരിയേണ്ടി വരുന്നു.

സിനിമക്കാരുടെ അതേ അവസ്ഥയാണ്‌ ഫേസ് ബുക്കിലും.

         കല്യാണത്തിന് മുമ്പ് സജീവമായിരുന്ന ഒരു പെണ്‍ സുഹൃത്തിനെ കല്യാണം കഴിച്ച ശേഷം അമേരിക്കയിലേക്ക് കൊണ്ടുപോയി. ഇപ്പോളവളുടെ പൊടി പോലും ഇല്ല കണ്ടുപിടിക്കാൻ. മെസഞ്ചർ വഴി പരിചയപ്പെട്ട ബന്ധം വിവാഹമായി വളർന്നപ്പോൾ അവളെ അതിനനുവദിക്കാത്ത മറ്റൊരു ഭര്ത്താവ് ഇപ്പോഴും നെറ്റിൽ സജീവമാണ്. തന്റെ പേരുമായി യാതൊരു സാദൃശ്യവുമില്ലാത്ത തൂലികാ നാമം തിരഞ്ഞെടുത്ത ഒരു പെണ്‍പുലി സ്വകാര്യമായി പറഞ്ഞത് ഇതൊന്നും പുള്ളിക്കാരന് ഇഷ്ടമില്ലെന്നാണ്. തന്നെ സ്നേഹിക്കുന്ന ഭര്ത്താവ് ഇതറിഞ്ഞാൽ എന്തും സംഭവിക്കാം.

          ഉദ്യോഗസ്ഥകളായ സ്ത്രീകള് പോലും ഭർത്താവുദ്യോഗസ്ഥകന്റെ സദാചാര പോലീസിങ്ങിനു വിധേയരാണ്. അവർക്കും ഫേസ് ബുക്ക് എന്നാൽ ഭര്ത്താവ് കൂടെയില്ലാത്ത വേളയിൽ മറ്റൊരു പേരില് തുറക്കാവുന്ന വിലക്കപ്പെട്ട ഒരു കനിയാണ്. 500-1000 വരെ ലൈക്‌ വാരിക്കൂട്ടി സ്വന്തം ഐഡി വെച്ച് എഴുതുന്ന ഗൾഫിൽ ജോലിയുള്ള ഒരു ഉദ്യോഗസ്ഥ പറഞ്ഞത് ഇതുവരെ അദ്ദേഹത്തിന്റെ ഒരു ലൈക്‌ പോലും കിട്ടിയിട്ടില്ലെന്നാണ്. പരമാവധി നിരുത്സാഹപ്പെടുത്തുകയും ചെയ്യുന്നു. മലയാളിക്കിതെന്തു പറ്റി ?

            ഒരു പാട് എഴുതാനുണ്ട്. കൂടുതൽ എഴുതി പോസ്റ്റ്‌ നീട്ടുന്നില്ല. ഫേസ് ബുക്ക് ഒരു നനല്ലയിടമാണെന്നോ നിബന്ധമാണെന്നോ കരുതാതെ മാറി നില്ക്കുന്ന ഒരു പാട് സ്ത്രീകളുണ്ട്. അവരെ കുറിച്ചല്ല എന്റെ പ്രതിവാദ്യം. അതവരുടെ ഇഷ്ടപ്രകാരമാണ്.
സ്വന്തം ഭാര്യയുടെ ഫേസ് ബുക്ക് അടച്ചുപൂട്ടി സദാചാര പെട്രോളിംഗ് നടത്തി ലിംഗ സമത്വം പ്രസംഗിക്കുന്ന മലയാളി ആണ്മഹിമയുടെ നിജസ്ഥിതി അറിയിച്ചതാണ്...

ലിംഗ സമത്വം മഹാശ്ചര്യം,
നമുക്കും കിട്ടണം ഫേസ് ബുക്ക്‌ ഇല്ലാത്തൊരു ഭാര്യയെ.

മീസാൻ കല്ല്‌

അമ്മ അവന് ജന്മം നൽകി

കാമുകി അവന് ജീവിതം നൽകി.

ഭാര്യ അവന് കുട്ടികളെ നൽകി.

ഏജന്റ് അവന് വിസ നൽകി.

കഫീൽ അവന് പണി നൽകി.

പ്രാരാബ്ദങ്ങൾ അവന് ജീവപര്യന്തം പ്രവാസം നൽകി.

മീസാൻ കല്ല്‌ മാത്രം അവന് വിശ്രമം നൽകി.


സ്വയം ചികിത്സ

പുകവലി കുറയ്ക്കാനാണ് ഡോക്ടറുടെ ഉപദേശ പ്രകാരം അയാൾ ഫേസ് ബുക്ക്‌ തുടങ്ങിയത്.

ഫേസ് ബുക്കിൽ നാലും അഞ്ചും പൊസ്റ്റികളിട്ടു സജീവമായതോടെ അയാൾക്ക് പുകവലിക്കാൻ നേരം കിട്ടാതായി.

എന്നാൽ അധികം വൈകാതെ ഇത് മറ്റൊരു ലഹരിയാണെന്ന് മനസ്സിലായപ്പോൾ അയാൾ ഡോക്ടറുടെ ഉപദേശ പ്രകാരം ഫേസ് ബുക്കിൽ നിന്നും സൈൻ ഔട്ട്‌ ചെയ്ത് വാട്സപ്പിൽ സജീവമായി.

അതോടെ പുകവലിയും ഫേസ് ബുക്കും നിശ്ചലമായി.

ഒരാഴ്ച കൊണ്ട് തന്നെ വാട്സപ്പ് തന്റെ ഉള്ള സമാധാനവും ആരോഗ്യവും കവർന്നെടുക്കുമെന്നായപ്പോൾ ഇത്തവണ അയാൾ ഡോക്ടറുടെ അടുത്ത് പോയില്ല. ചികിത്സ അയാൾക്ക് തന്നെ അറിയാമായിരുന്നു.

അയാൾ വീണ്ടും പുകവലി തുടങ്ങി.
-----------------------------------------------------------------------------------------
നിയമപരമായ മുന്നറിയിപ്പ് : രോഗമെന്തായാലും സ്വയം ചികിത്സ അരുത്.